BOGOTA, AP.- Un hues kolombiano a ninga libertat di Jesus Santrich, un eks komandante di FARC. Fiskal ta demand’é ku delitonan di narkotráfiko.
Su defensa a pidi pa liber’é indikando ku su kaptura tabata ilegal.
Santrich ta wòrdu buská pa narkotráfiko na Merka. E pais a pidi pa e wòrdu detené i ekstraditá na aña 2018, pero resientemente un hues a ordená pa e wòrdu liberá, indikando ku no tin sufisiente prueba pa e wòrdu ekstraditá. Algun dia pasá, tur kos a indiká ku Santrich lo wòrdu liberá for di prizòn di La Picota, kaminda e tabata detené pa 13 luna largu. Algun ratu despues ku el a wòrdu kapturá pa polis kolombiano, funshonarionan a indiká ku a kolektá prueba durante último momentu, kual ta mustra ku e eks gueriero a plania pa manda kokaina Merka, algun luna despues ku FARC a firma e tratado di pas na aña 2016.
