LONDON, REINO UNI, AFP.- Reino Uní a habri su tiendanan djárason, terminando su di dos ‘lockdown’ sperando ku kos lo bira normal bèk despues ku e gobièrnu anunsiá e kampaña di vakuna kontra Corna vírus ku lo kuminsá otro siman.
E tiendanan a keda será durante kuater siman. Pero sentronan deportivo tambe a kuminsá risibí un kantidat limitá di hende pa promé biaha for di mart.
E promé minister Boris Johnson a bisa ku e aprobashon di e vakuna kontra Corona vírus desaroyá pa Pfizer BioNTech a kombertí Reino Un den un pionero di e outorisashon aki. “Nos por ta sigur ku nos lo triunfá i rekuperá nos bida i tur loke nos gusta di esaki”, asina Johnson a bisa den un rueda di prensa. Pero el a pidi pa tur hende sigui respetá e reglanan di salú rekordando ku “ainda nos lucha no a kaba”.
Ku 59.000 morto konfirmá, Reino Uní ta e pais mas afektá pa e pandemia di COVID.
Reino Uní a hasi un pedido di 40 mion vakuna i e pais lo haña 800.000 di esaki na komienso di otro siman, segun indikashon di e minister di Salú, Matt Hancock.
E kampaña di vakuna ta kuminsá ku habitante i trahadónan den kasnan di kuido, personal di salú i esnan riba 80 aña.
E pais tin 66,5 mion habitante i mester di dos dósis pa kada persona. Reino Uní a reservá vakunanan di otro laboratorionan tambe, por ehèmpel 100 mion di e ekipo britániko Oxford/AstraZeneca i 60 mion di e vakuna di Novavax.
