WASHINGTON, AP.- Den un interkambio asombroso di insulto entre polítikonan di un mesun partido, senador republikano Bob Corker a akusá presidente Donald Trump di “ruina e imágen di nos pais” ku falsedat, ofensa i hostigamentunan frekuente.
Trump a rospondé furioso riba Twitter, yamando Corker “inkompetente”, un hende “totalmente kibuká” i ku “ni sikiera por wòrdu skohe komo hefe di estado di un asilo pa animal”.
E interkambio a pasa algun ora promé ku Trump a yega den Kongreso pa un lùnch ku senadornan, kaminda e mester a diskutí intentonan pa aprobá un reforma fiskal.
Trump a yega den Kongreso i a wòrdu risibí pa e lider di mayoria republikano den Senado, Mitch McConnell. Ambos a smail dilanti kámara i a ignorá preguntanan di periodista.
“Ora Trump bandoná presidensia, mi ta teme ku e lo wòrdu rekordá prinsipalmente pa e manera kon el a ruina e imágen di nos pais, pa su insultonan, pa su falsedatnan i mi ta kere ku esaki sigur ta lamentabel”, asina Corker a bisa na reporteronan den Capitolio. “Su estilo di gobièrnu ta pa dividí hende, insultá esaki i bisa falsedat”.
Corker, kende ta na punto di retirá di Kongreso sin reperkushon polítiko pa teme, a afirmá ku e i otro polítikonan a purba di konvensé Trump pa adoptá un tono mas digno pero “opviamente nunka lo ta na altura di su kargo komo presidente di e pais”.
