TEHRAN, AP.- E lider supremo di Iran a manifestá djaluna ku su pais lo no kuminsá un guera ni negosiashonnan ku Merka, na momentu ku e gobièrnu di presidente Donald Trump ta bolbe pone sanshonnan ku a wòrdu retirá bou di e akuerdo nuklear di 2015.
Den un diskurso transmití na e kanal di televishon estatal, ayatola Ali Jamenei a bisa ku “ademas di e sanshonnan, e merikanonan a konsiderá dos opshon mas kual ta gueria i negosiashon. Guera lo no pasa i negosiashonnan tampoko”.
Presidente Trump a retirá Merka di e akuerdo nuklear ku Iran huntu ku otro potensianan mundial den mei. Siman pasa e gobièrnu merikano a bolbe pone sanshonnan riba Tehran, hasiendo e krísis finansiero ku a afektá su moneda mas grave. Trump a sugerí ku e ta dispuesto na negoshá ku e lidernan iraní, pero esaki ta imposibel sin outorisashon di Jamenei, kende tin e último palabra riba tur asuntu importante.
“E negosiashonnan ku Merka definitivamente lo perhudiká nos i ta prohibí”, asina Jamenei a indiká i a agregá ku e merikanonan a demostrá ku nan no por ta konfiabel. “Un negosiashon ku e gobièrnu sin pasenshi di Merka ta nifiká un instrumento atraves di kual por oumentá su hostilidat”, asina el a indiká.
Pa loke ta e krísis finansiero, Jamenei a kulpa e gobièrnu di presidente Hasan Ruhani i a bisa ku e problemanan monetario a resultá for di “kuestionnan atministrativo ku no ta vinkulá ku e sanshonnan.
