TEHRAN, AP.- E funshonario iraní ku ta dirigí e investigashon di un avion ukraniano ku a kai komo kousa di un eror di Guardia Revolushonario a kanselá plannan pa manda e grabadonan pa Ukrania, un dia despues ku el a bisa ku Iran lo manda e ‘black box’ pa un análisis den eksterior.
“E grabadonan di e buelo di e avion Boeing ta den poder di e iranínan i nos no tin intenshon di proveé esaki na Ukrania”, asina Hassan Rezaeifar a bisa segun e agensia di notisia estatal IRNA.
Iran ta trahando pa rekuperá e grabashonnan di kabina i datonan di buelo, asina el a señalá. “Nos por manda esaki pa Ukrania òf Fransia, pero te ainda nos no a tuma un desishon”.
E agensia di notisia semiofisial a bisa e mesun funshonario djasabra, bisando ku lo manda e grabadonan pa Ukrania, kaminda ekspertonan ukraniano, franses, merikano i kanades lo yuda analisá nan. Iran a indiká anteriormente ku e black box ta kasi kompletamente destrosá pero ku por us’é ainda.
