ROMA, ITALIA, AFP.- Italia a anunsiá medidanan nobo djaluna pa para e kantidat di kasonan di COVID-19, kual ta inkluí prohibishon di fiestanan privá i orarionan mas rígido pa tur bar i restorant.
E dekreto, firma pa promé minister Giuseppe Conte, vigente pa 30 dia largu ta prohibí tur fiesta i selebrashonnan den aire liber i espasionan será. E kantidat di bishita permití a wòrdu limitá na seis.
Tur deporte di kontakto entre amigu, manera futbòl i basketbòl a wòrdu prohibí.
Barnan i restorant no por atendé ningun kliente nobo despues di 9 or di anochi. “Nos mester evitá un lockdown general atrobe”, asina Conte a bisa, durante un konferensia di prensa den e sede di gobièrnu.
E akuerdo a keda firma riba djamars mardugá despues di un serie di opservashon i negosiashon ku dirigentenan di vários region, preokupá ku e konsekuensianan ekonómiko.
Italia a registrá mas di 36.000 morto desde komienso di e pandemia i a pasa pa e segundo fase di restrikshon spesífiko, pa evitá un lockdown total dor ku e kasonan a subi den e último simannan ku a pasa.
Italia a reportá 4.619 kaso nobo den 24 ora, un sifra komparabel ku esun di aprel. Pero e sifranan ta muchu mas abou kompará ku e kantidat di infekshon na Spaña i Fransia.
