YUMA, ARIZONA, MERKA, AP.- E sekretario interino di Seguridat Nashonal Kevin McAleenan a bisa djabièrnè ku e kantidat di migrantenan ku a krusa frontera e luna aki a baha ku 25%.
McAleenan a bisa den un konferensia di prensa na Washington ku ainda e sifra ta haltu, pero ku a lo ménos esaki ta un komienso. El a duna krédito na México pa e pais su esfuerso pa para e migrantenan sentroamerikano promé ku nan yega México, un strategia motivá pa e menasanan di presidente Donald Trump, ku lo pone impuesto riba tur produkto mehikano.
E kantidat di migrantenan ku ta krusa frontera na sùit di Merka a subi apesar di e polítikanan estrikto di presidente Donald Trump. Mas di 100.000 persona, den su mayoria di Sentro Amérika a krusa frontera tur luna durante e último lunanan ku a pasa.
McAleenan a pone konkluí ku e oumento den yüni ta dor di e kalor di verano, un temporada kaminda ménos hende ta krusa normalmente.
E instalashonnan kaminda e migrantenan ta wòrdu detené ta sumamente saturá, i tantu aktivistanan komo abogadonan a kritiká e kondishonnan den e instalashonnan aki.
