ANKARA, TURKIA, AP.- E kantidat di morto despues di un temblor fuerte ku a sakudí parti ost di Turkia a subi na 29 persona miéntras ku ekiponan di reskate ta sigui buska mas posibel víktima entre ruina di edifisionan ku a kolèps, segun indikashon di funshonarionan.
E minister di Interior, Suleyman Soylu a bisa den un konferensia di prensa ku 18 persona a muri den provinsia di Elazig, e episentro di e temblor di djabièrnè. kuater mas a muri na Malatya.
E agensia nashonal ku ta manehá reskatenan a aktualisá e sifra ku shete víktima mas.
E kantidat di personanan heridá a yega 1.243 persona i 34 di nan ta den kuido intensivo ounke nan estado no ta kritiko, segun señalashon di e minister di Salú, Fahrettin Koca.
Presidente Recep Tayyip Erdogan a bisa djasabra ku el a bishitá e zonanan mas afektá i a partisipá na entiero di un dama i su yu ku a fayesé den e temblor aki. El a pidi e turkonan pa no hasi kaso na rumornan negativo tokante e pais su falta di preparashon kontra temblor.
