WASHINGTON, MERKA, AFP.- E kasá di Joaquin “El Chapo” Guzman a deklará djaweps ku e ta kulpabel pa yuda su kasá ku trafikashon di droga den Merka. Emma Coronel Aispuro di 31 aña di edat ta enfrentá un kondena di bida largu den prizòn.
Coronel a deklará kulpabel pa tur kuater akusashon den su kontra, inkluyendo trafikashon di droga i labamentu di plaka den korte na Washington. E ta enfrentá 15 aña pa trafikashon di droga, maske ku su deklarashonnan ta yuda redusí su sentensia.
Outoridat merikano a arest’é den febrüari na Dulles International Airport, akusando e di a yuda su kasá ku trafikashon di droga.
Guzman ta lider di Kartel di Sinaloa, un di e gruponan di trafikashon di droga di mas notorio den Mexico. A ekstradit’é pa Merka na aña 2017, i a konden’é na bida largu den prizòn dos aña despues.
E kapo tabata manehá un operashon ku tabata entregá toneladanan di droga na Merka i ta responsabel pa vários asesinato, segun dokumentonan di korte.
Kartel di Sinaloa a importá mas di 495 tòn di kokaina, 99 tòn di heroina, 49 tòn di metamphetamine i 99 tòn di mariwana durante 25 aña largu, segun indikashon di departamento di Hustisia di Merka.
Coronel a paresé kasi tur dia den korte durante Guzman su kaso di tres luna na New York. Tabatin vários sugerensia ku e tabata embolbí den e negoshi i eskapenan di prizòn di Guzman, pero outoridat no a deten’é.
