WASHINGTON, AP. – Sekretario di Estado John Kerry a pidi pa investigá Rusia i Siria pa posibel krímennan di guera kontra sivilnan sirio, mustrando kon e relashon entre Washington i Moscow ta birando mas grave.
Kerry a bisa ku forsanan sirio a ataká un hospital durante anochi, lagando 10 morto i 100 herido. Esaki a wòrdu deskribí komo e último atake di Moscow i su aliado na Damasco kontra sivilnan.
“Rusiaierégimen debe mundu mas ku un splikashon tokante dikon ta sigui atakante hospitalnan, i tambe instalashonnan médiko i muhé i muchanan”, asina Kerry a bisa banda di e minister franses di Relashon Eksterior Jean Marc Ayrault, kende a yega Washington direktamente despues di reuní ku funshonarionan ruso na Moscow.
Kerry a bisa ku e aktonan aki ta “eksigí un investigashon apropiá di krímennan di guera”.
Ayrault, a papia tokante un esfuerso franses nobo pa konkretá un tregua na Siria. Pero no ta evidente ki bentaha su plan di e proseso dirigí pa Merka i Rusia por tin, kual a kolèps luna pasá.
E trato ku Kerry i minister ruso di Relashon Eksterior Serguei Lavrov a bai di akuerdo kuné riba 9 di sèptèmber lo a krea un aliansa di kontra terorismo na Siria, si tabatin un suspenshon di kombate di un siman i permití pa duna suministro di yudansa na sivilnan desesperá den zonanan kapturá pa rebeldenan manera Alepo i otro áreanan.
No a kumpli ku ningun di e kondishonnan aki.
