PARIS.- Ketu bai tin hopi destrukshon ta tumando lugá den sentro di Paris. Vários grupo a uni na e lucha kontra oumentu di preis di kombustibel na Fransia. Te na ora ku gobièrnu a anunsiá ku no ta oumentá e preisnan tòg e protestanan a kontinuá. Banda di e protestanan tin destrukshon di sitionan importante di Fransia.
Den e di kuater wikènt di protesta anti gobièrnu, e manifestantenan a bira violento. Nan a kibra barikadanan ku polisnan a pone i asta a sende algun barikada na kandela. Mas lat a kuminsá sende vehíkulonan na kandela miéntras ku polis ta tira gas lakrimógeno den e multitut.
Tabatin mas polis ku nunka den kayanan di Paris pa trata na kontrolá e situashon ku a surgi, pero e grupo di “yellow vests” ku a haña sosten di otro gruponan den e sosiedat, a yega na gran kantidat. Polis a detené algun shen persona. Den otro siudatnan di Fransia tambe tin protesta, pero den sentro di Paris e protestanan ta bai kompañá ku violensia i hopi destrukshon.
