CARACAS, VENEZUELA (AFP).- Un popular komediante i un pastor evangéliko a postulá nan mes pa e elekshonnan presidensial di Venezuela komo opositornan alehá dje aliansa liderá pa Maria Corina Machado, ku ta akusá nan di ta kolaborá ku chavismo i a denunsiá ku ta blòkia pa inskribí su kandidatura.
Benjamin Ruasseo, famoso pa su personahe di humor “El Conde del Guácharo”, i Javier Bertucci, aktualmente diputado di Parlamento, a yega “Consejo Nacional Electoral” pa formalisá nan partisipashon den e elekshonnan di 28 di yüli den kua Nicolás Maduro lo buska un di tres mandato di seis aña.
“Mi ta un proposishon ku por reuní venezolanonan”, segun Ruasseo, di 63 aña, postulá pa su partido “Confederación Nacional Democrática” (Conde) ku a keda sin usa su nòmber artístiko. E tabata kandidato den 2006, pero despues a baha su aspirashon.
Bertucci, di 54 aña, a surgi den esena polítiko den 2018 tempu ku Maduro a keda reeligí pa promé biaha, den un elekshon den kua oposishon a bòikotiá pa motibu di a konsiderá ku tabatin froude.
Otro ocho kandidato definí komo antichavistanan a inskribí pa e elekshon, ounke ku e oposishon tradishonal ta referí na nan personanan ku ta buska pa kibra e unidat i dividí e elektorado pa garantisá e viktoria di Maduro.
Promé ku formalisá dilanti di CNA, e kandidatonan mester pasa via un sistema outomatisá, di kua e akseso a keda blòkiá pa Plataforma Unitaria Democrática.
Machado, faborito den enkuestanan pero inhabilitá pa traha pa gobièrnu pa 15 aña, a nominá e filósofo i profesor di universidat Corina Yoris komo su representante den elekshon. Pero te ku ayera tardi e no por a inskribí.
Oposishon ta konta ku apénas dos posibilidat pa postulá pa su kandidato, inkluso esun di PUD, despues ku CNE i korte supremo, akusá di ta faboresé e chavismo gobernante, a laga vários partido opositor sin posibilidat di partisipá. Ademas nan kandidatura por keda rechasá.
E postulashon ta sera awe, ora ku presidente Maduro mester formalisá su kandidatura pa e gobernante Partido Socialista Unido de Venezuela (PSUV), ounke otro organisashonnan iskièrda ya a postul’é.
