LA PAZ, AP.- E komunidat internashonal a manifestá su preokupashon pa e susesonan despues di elekshon na Bolivia. Dos region boliviano a eksigí pa realisá un di dos buèlta di votamentu kual a derivá den un serie di disturbio ku manifestantenan denunsiando froude na fabor di mandatario Evo Morales.
E konteo di voto a revelá ku Morales a pèrdè popularidat i e desishon di TSE pa interumpí e proseso di konteo a lanta sospecho di froude ku a derivá den un serie di disturbio na vários parti di e pais.
E gobièrnunan di Brasil, Argentina i Colombia a manifestá nan preokupashon. E supsekretario di Estado, Michael G. Kozak, a publiká ku Washington ta rechasá “intento di TSE pa violá demokrasia” i a pidi e órgano pa “aktua inmediatamente pa restourá kredibilidat den e proseso di konteo di voto”.
Union Europeo tambe a uni e paisnan. E bloke a publiká un komunikado indikando ku “e interupshon inesperá den konteo di voto a generá duda serio ku mester wòrdu aklará inmediatamente”.
Morales a reuní ku opservadornan di OEA kual su Konseho Permanente a wòrdu desplegá pa analisá e situashon na Bolivia. Nashon Uní a bisa ku e organisashon ta preokupá ku tur e “insidentenan di violensia”, segun un komunikado di su bosero, Stephane Dujarric.
