MILAN, AP.- Un korant di deporte na Italia a risibí diferente kritiká dor ku e empresa a publiká un portada ku e título “Black Friday”, ku e imágen di dos futbolista kolo skur.
Corriere dello Sport a publiká imágen di e defensor Chris Smalling di Roma, i e atakante Romelu Lukaku, di Inter.
E portada ta suma un serie di insidente rasista ku a afektá futbòl italiano durante e temporada aki, inkluyendo koro ofensivo kontra hungadónan kolo skur den stadion.
E komunikado di UEFA ta konsiderá e portada komo algu ku “difísilmente ta yuda den un diskushon madurá tokante e asuntu grave ku e deporte mester enfrentá i e sosiedat en general”.
E korant a purba defendé e título konsiderando esaki komo “inosente” i a splika ku su intenshon tabata pa “elogiá diversidat”.
