LONDON, AP.- Un korte britániko a disidí ku e oudiensianan tokante Julian Assange su ekstradishon pa Merka lo inisiá na komienso di otro aña. E pais merikano ta akusá e fundadó di WikiLeaks ku revelashon di informashon ofisial i militar sekreto.
E hues di Korte di Hues di Westminister a fiha e promé oudiensia riba 25 di febrüari 2020, kual lo dura 5 dia. Lo tin oudiensianan preliminar den yüli i òktober.
Assange, kende ta sufriendo pa problema di salú den prizòn, a hasi su aparishon via un videokonferensia.
Ben Brandon, un abogado britániko ku ta representá e gobièrnu di Merka, a bisa ku e kaso ta “relashoná ku un di e revelashonnan di informashon konfidensial mas grandi den historia di Merka”.
E prokuradornan merikano kier pa huzga Assange pa violashon di e Lei di Spionahe. El a publiká un kantidat enorme di dokumentonan sekreto ku nòmber di vários persona ku a duna informashon konfidensial na forsanan di Merka i e koalishon na Irak i Afganistan riba WikiLeaks.
E oustraliano di 47 aña ta den prizòn na Belmarsh, for di London, kaminda e ta sintando un kondena di 50 siman pa violá e kondishonnan di libertat bou di fiansa na Gran Bretaña. Su abogadonan a apelá i Suesia ta investigando e pa violashon.
