MONROVIA, AP.- E eks futbolista di Aña di FIFA Geroge Weah a wòrdu skohé pa presidente di Liberia, un pais ku ta enfrentá su promé transferensia demokrátiko di poder den mas di 70 aña.
E visepresidente Joseph Bokai a felisitá Weah djabièrnè pa su triunfo den elekshon presidensial di e nashon afrikano oksidental. Ku mas di 98% di voto konta, Weah a haña 61,5% kompará ku 38,5% pa Bokai.
Den un diskurso pa e nashon, Bokai, a ofresé yudansa na e gobièrnu nobo si esaki kier.
Liberia, un nashon fundá pa katibunan merikano liberá, ta presensiando e promé entrega pasífiko di poder den mas di 70 aña, despues di retiro di e promé mandatario muhé, e premio Nobel Ellen Johnson Sirleaf.
Weah di 51 aña, un senador ku a drenta polítika mas di 10 aña pasá, lo asumí su puesto den yanüari.
El a gana e promé ròndu elektoral den òktober pero sin sufisiente voto pa partisipá direktamente.
E historia di Weah su progresonan di orígen sumamente pober a inspirá su partidarionan, kende ta yam’é “King George”.
Weah a nase den un villa di miseria den Monrovia, i desde trempan el a mustra indikashon di su talento pa Futbòl. El a hunga pa klupnan prinsipal di e pais promé ku el a kuminsá su karera internashonal na Camerun, i despues pa Monaco i Paris Saint Germain, kaminda el a bira famoso.