BEIRUT, AP.- E lider di grupo Estado Islámiko a paresé pa promé biaha den sinku aña den un video kaminda e ta rekonosé e derota di e grupo na Siria. pero el a hura ku tin un “bataya largu” riba kaminda.
Abu Bakr al-Baghdadi a papia di e bombardeonan di Pasku di Resurekshon na Sri Lanka, kual a laga mas di 250 persona morto. E grupo a claim responsabilidat di e atake aki, segun konfirmashon di grupo SITE Intelligence.
E video ta mustra al-Baghdadi sinta riba suela ku un arma banda di dje. El a papia ku tres hòmber sinta su dilanti. Nan kara tabata tapá.
Esaki ta su promé aparishon desde un seremonia den moské al-Nuri den e siudat irakí Mosul na aña 2014. El a pidi tur musulman rònt mundu pa hura lealtat na e kalifato i pa obedesé komo lider.
Al-Baghdadi a rekonosé ku Estado Islámiko a pèrdè e guera na Baguz, un pueblo na ost di Siria, kontra Forsa Demokrátiko Sirio dirigí pa kurdonan i ku respaldo di Merka.
Ku un rekompensa di 25 mion dòler, al-Baghdadi ta e hòmber mas buská na mundu. E ta responsabel pa dirigí matansanan masivo i tambe dirigí i inspirá atakenan terorista den diferente kontinente.
