BRUSELAS.- Despues di basta tempu di tenshon, ta parse ku lidernan den Oropa a haña otro pa loke ta trata Brexit. Informashon a drenta ku awe djadumingu e 27 lidernan di Union Oropeo a bai di akuerdo ku e kondishonnan ku a keda akordá ku Gran Bretania riba Brexit. A sera e akuerdo durante di un enkuentro na Bruselas. Ta trata un tratado di separashon ekstenso i tambe un deklarashon polítiko riba e relashon ku mester sigui despues di e separashon britániko.
E akta di separashon ta regla e.o derecho di siudadano na ámbos banda di e kanal i tambe kon ta atendé kuentanan. Ta spera ku e británikonan ta bai paga alrededor di 40 miar euro den kuadro di kumplimentu ku nan obligashonnan di e miembresia. E akuerdo ta regla tambe ku lo no bin un frontera fuerte entre Irlanda i nort-Irlanda britániko.
E akuerdo ta indiká ku e inglesnan ta bandoná Union Oropeo dia 30 di mart. E negosiashonnan pa e relashon di futuro por kuminsá despues di e fecha menshoná. ámbos partido ta kere ku e relashonnan di futuro mester keda mas mihó posibel. Pa loke ta trata derechonan den peska sí ta premirá ku e diskushonnan lo por bira basta difísil.
Tin un periodo di transishon te 31 di desèmber 2020, den kua legislashon di Union Oropeo ta konta pa e británikonan i kaminda nan ta kontribuí finansieramente tambe. Úniko kos ku falta ainda ta aprobashon di tantu e Parlamento Britániko komo di e Parlamento Oropeo. Mas detaye den EXTRA.
