WILLEMSTAD.- No tin mester di inventá e wil pa atendé e problema na Ennia. Esei pa motibu ku ya tin un entidat ku ta hasiendo e trabou pa solushon un problema ku tin e mesun karakterístikanan ku Girobank. A lanta Giro Settlement Holding (GSH) pa atendé i solushoná e problema dje banko, i lo por a lo ménos pidi su konseho pa sa kon nan ta hasiendo esaki. Lo por usa e mesun struktura i aserkamentu di GSH. Esei EXTRA por a komprondé for di un kòmbersashon ayera ku e dos direktornan di GSH, srs. Thomas Domhoff i Camillo Bakhuis. Segun e direktornan, GSH te awor ta kumpliendo ku su tarea di un forma eksitoso i asta ta surpasando tur espektativa.
Segun e direktornan, GSH ta e úniko vehíkulo lantá ku un propósito spesial na Kòrsou i ku un meta spesífiko pa likidashon di un entidat finansiero. Esaki tabata e promé konstrukshon di likidashon na Kòrsou, ku e ophetivo pa supervisá un sistema di pago kontrolá dje plakanan di Girobank.
Komo bankeronan ku vasto eksperensia den e mundu finansiero esaki tabata nobo pa nan, i por bisa ku despues di tres aña nan ta kompletamente kómodo den loke ta ser hasí. Por ehèmpel, riba diferente tereno nan mes a opta pa hasi investigashon pa huntu ku akountentnan por a yega na un balor mas real dje portafolio di fiansanan di Girobank. Komo personanan ku entretantu a bira ekspertonan riba e tereno aki nan ta kere ku tin investigashonnan profundo ku ta nesesario pa ser hasí den e portafolio di penshun di Ennia. Asta nan ta antisipá ku lo bira nesesario pa bini un redukshon den esaki. I debí na e operashon i aserkamentu eksitoso di GSH durante e tres añanan aki i sigur teniendo kuenta ku e eksperensia, asta lo ta un bon idea no solamente pa pidi konseho di GSH, sino asta pa envolví e entidat aki den e likidashon kontrolá di Ennia. E direktornan ta lamentá, ya ku lo tin di inventá e wil, i ademas e lo skapa gastu. Nan ta keda dispuesto i disponibel pa duna nan granito den esaki, ya ku ta algu den kual henter pais lo ser salbá.
