CARACAS, VENEZUELA, AFP.- Hustisia venezolano lo huzga e dos merikanonan detené pa un invashon frakasá kontra Venezuela, segun indikashon di presidente Nicolas Maduro djárason. Washington a bisa ku lo usa tur opshon pa repatriá nan.
E dos detenidonan ta “arestá i lo wòrdu huzga pa e Fiskal general di e repúblika i den tribunal sivil di Venezuela”, segun indikashon di Maduro na periodistanan.
Te ainda a detené binti “mersenario”, di kual vários ta militar venezolano, detené despues di un invashon frustra riba 3 di mei riba playa di Macuto den estado La Guaira.
Kasi sesenta pais ta rekonosé e lider opositor venezolano Juan Guaido komo e presidente legítimo di Venezuela. Guaido a bisa ku e afirmashonnan di fiskal venezolano ta parti di “un ola nobo di diktadura”.
Presidente Donald Trump a bisa ku e denunsianan ta un gran kampaña di informashon robes di Caracas i a atvertí ku Merka lo usa tur opshon na su disposishon pa repatriá e merikanonan aki.
