HONG KONG, AP.- E manifestantenan a protestá den áwaseru fuerte na Hong Kong, kaminda e manifestashonnan pro-demokrasia masivo a bira un aktividat normal pa hopi fin di siman kaba riba e isla.
E organisadónan a ekspresá nan speransa pa e manifestashonnan di speransa di ayera kana pasífiko, mirando ku e último manifestashonnan a wòrdu marká pa konfrontashonnan violento ku polis.
“Nos ta spera ku lo no tin ningun situashon kaótiko”, segun organisadó Bonnie Leung. “Nos ta spera ku nos por mustra mundu ku Hong Kong por protestá di forma pasífiko”. E organisashon di Leung, Frente di Derechi Sivil i Humano, a organisá tres marcha masivo for di yüni na Hong Kong.
Un funshonario chines na Beijing a kondená e deklarashonnan di Merka ku ta sostené e manifestashonnan pro-demokrasia na Hong Kong.
You Wenze ta konsiderá e komentarionan komo un interferensia kompletu den asuntunan interno na China. You a agregá ku 7,5 mion residente di Hong Kong i e pueblo chines en general ta rechasá e akshonnan di “un grupo chikitu di manifestantenan violento”, manera “kualkier tipo di interferensia di forsanan estranhero”.
You no a menshoná ningun legislador, pero vários senador merikano i legislador di Kongreso inkluyendo e presidente di Kámara di Representante Nancy Pelosi, a reiterá Merka su kompromiso ku Derechi Humano i a pidi e gobièrnu di Hong Kong pa pone fin na e konfrontashon.
