ST. PAUL (AP).- E arkidiósesis di San Pablo i Minneapolis a anunsiá un akuerdo ku $210 mion ayera ku e 450 víktimanan di abusu seksual den iglesia komo parti di su plan di reorganisashon, hasiendo esaki e di dos pago pa daño i perhuisio di mas grandi den historia komo resultado di un skandal, algu ku a sakudí Iglesia Katóliko Romano. E abogado dje víktimanan, Jeff Anderson, a duna di konosé ku e plaka ku ta un montante total di $210.290.724.- lo bai den un pòt pa por paga sobrebibientenan, aunke e montante pa kada sobrebibiente lo mester keda determiná ainda.
Anderson a deklará tambe ku un plan di reorganisashon lo ser entregá awor na un hues den kasonan di bankarota pa aprobashon, i despues esaki lo ser mandá pa e víktimanan pa votashon. Anderson ta asumí ku unánimemente nan lo aprobá esaki tambe. “Nos a kambia e tereno di wega”, asina Jim Keenan kende a ser abusá seksualmente komo mucha den añanan 80 dor di un pastor a duna di konosé. “Awor si nan tin di skucha e víktimanan, anto esei ta algu grandi”.
Marie Mielke, kende a ser abusá for di 1997 te ku 2000 dor di un seminariano kende despues a bira pastor, a hasi un apelashon riba demas sobrebibientenan pa nan tin e kurashi pa sali i papia.
