NEW YORK, AP.- Meetup.com, un página pa medio di kual hende por reuní físikamente pa un interes komun a uni na e movementu di resistensia kontra presidente Donald Trump. E ‘site’ lo revelá su plannan den próksimo dianan riba un asosashon ku un grupo di trabou pa kordiná protestanan na Merka di mas di 120 mil aktivista ya involukrá ku gruponan kontra di Trump den Meetup.
Ta un medida ku rísiko pa un kompania di teknologia ku a yuda miónes di persona na topa ku otro den bida real debí na nan interes komun den tur tipo di asuntu, for di eskurshon te ku siña idioma, pa nan reflehá un disposishon kada mes mas grandi di algun empresa teknológiko importante di uni kontra di e presidente republikano.
E direktor ehekutivo di Meetup Scott Heiferman a bisa na The Associated Press ku e akuerdo nobo ku lo keda publiká komo #Resist, lo duna e movementu di protesta, aktualmente poko organisá, un infrastruktura pa organisá reakshonnan grandi den polítika di e presidente nobo.
Pa Heiferman i otro lidernan teknológiko di mundu, e kampaña di Trump pa blòkia e entrada di personanan di vários pais mayormente musulman a surpasá e liña. Ora e krusa liña nan tin e derechi síviko di no keda ketu.
Kas Blanku no a kontesta e petishon pa komentario riba e plannan di Meetup.
