WASHINGTON, AP.- E sekretario di Defensa merikano Jim Mattis a defendé e uso di sòldatnan na frontera ku México, indikando ku esaki ta un bon training pa tempu di guera. El a señalá ku esaki ta similar na un medida di aña 1916 pa kombatí e revolushonario mehikano Fransisco Villa.
Mattis a ninga di papia tokante kosto di e mishon. El a afirmá ku e sifranan entregá “no ta korekto” i el a indiká ku “pronto nos lo haña sa e kosto real. Pues nos lo mantené boso na altura di e kostonan real”. Asina Mattis a indiká den deklarashonnan di prensa.
E 5.800 sòldatnan ku a haña tarea pa vigilá frontera a logra kumpli ku tur tarea di parti di Ofisina di Duana i Protekshon na Frontera, den un periodo di entre un siman i 10 dia. asina Mattis a señalá, ounke Pentágono i Departamento di Seguridat Nashonal ta preparando labornan adishonal. E fecha final di e mishon no a wòrdu anunsiá. E mishon aktual por terminá pa 15 di desèmber, pero esaki por kambia.
Ademas di e 5.800 sòldatnan aktivo, mas o ménos 2.100 efektivo di Guardia Nashonal ta proveé sosten desde aprel.
