WASHINGTON, AP.- Merka lo prohibí su siudadanonan pa biaha pa Norkorea desde otro luna. Asina Departamento di Estado i a informá djabièrnè.
Sekretario di Estado, Rex Tillerson, a disidí pa pone un “restrikshon geográfiko di biahe” pa Norkorea despues di morto di un studiante merikano Otto Warmbier luna pasa, kende a kai den koma despues di a wòrdu detené den e pais asiátiko.
E restrikshon ta di akuerdo ku oumento di prekoushonnan di Washington pa progresonan resien di Pyongyang den su programanan di arma atómiko i misilnan balistiko.
Ta difísil pa kuantifiká e kantidat di merikano ku ta bishitá Norkorea, inkluyendo pa gobièrnu di Merka. Sin embargo, Simon Cockrell, di grupo Koryo, un di e organisadónan prinsipal di biahe guia pa e pais, a bisa ku entre 800 i 1.000 merikano ta hasi esaki kada aña.
E bosero di Departamento di Estado, Heather Nauert a bisa den un komunikado ku “debí na e oumento di preokupashon riba e peliger grave di aresto i detenshon largu bou di e sistema polisial di Norkorea, sekretario a outorisá un Restrikshon Geográfiko di Biahe mediante ku ningun merikano por usa su pasport pa biaha den, òf via Norkorea.