SANTA ANA, CALIFORNIA, MERKA, AP.- Merka a registrá sinku kaso konfirmá di e vírus di China. Tur e personanan aki a biaha pa e siudat episentro di e brote, segun indikashon di outoridat di salú.
Dos kaso a wòrdu reportá durante dia: unu den kondado di Los Angeles i e otro na Arizona.
Un pashènt na sùit di California a kombertí den e terser persona diagnostiká ku e vírus nobo prosedente di China na Merka, segun indikashon di outoridat di salú.
E biaheronan di e siudat chines Wuhan a duna positivo pa e vírus aki, segun anunsio di e Agensia di Atenshon Sanitario di Kondado Orange. E pashènt di California a wòrdu poné den karentena den un hospital i su kondishon ta stabil, segun señalashon di e agensia.
Funshonarionan di Departamento di Salú di Arizona no a publiká género ni edat di e pashènt, pero a indiká ku su kondishon no ta grave i ku e ta den karentena.
E promé kaso konosí na California a surgi despues ku outoridat a detektá un kaso di Coronavirus na Washington riba 21 di yanüari i Chicago riba 24 di yanüari.
E pashènt aki a drenta den kontakto mesora ku outoridat sanitario, kaminda el a haña tep kon pa redusí su eksposishon na públiko miéntras e tabata sperando riba resultadonan di algun tèst ku el a hasi.
E personanan ku tabatin kontakto ku e pashènt tin un “riesgo abou” di desaroyá e infekshon, segun rekomendashon di e Sentro merikano pa Kontrol di Enfermedat (CDC).
E vírus por kousa keintura, tosamentu i pulmonia entre otro. E ta forma parti di e famia di Coronavirus, similar na e vírusnan mortal SARS i MERS kual tambe a provoká brotenan mortal den pasado.
