SAO PAULO, BRASIL, AFP.- E embahador di Merka na Brasil a afirmá ku lo tin “konsekuensia” serio pa Brasil si e pais opta pa e empresa di telekomunikashon chines Huawei pa instalá e konekshon di 5G den e pais. E anunsio a wòrdu hasí den un entrevista publiká pa e korant O Globo djárason.
“Mi no kier spesifiká ki sorto di represaya òf konsekuensia”, asina e embahador, Todd Chapman a bisa. Merka a bisa ku Huawei ta spioná pa e gobièrnu komunista chines.
Chapman a agregá ku Merka ta dispuesto na finansiá e instalashon di 5G, atraves di International Development Finance Corporation.
Reino Uní a anunsiá dos siman pasá ku lo ekskluí Huawei di su ret di 5G, pa motibu di seguridat nashonal di e pais. China a lamentá e desishon aki.
