WASHINGTON, AP.- E morto di e finansista Jeffrey Epstein, kende a kometé suisidio apesar ku e tabata detené den un di e prizònnan mas safe den e pais, a pone atenshon riba e echo ku sistema penitensiario di Merka ta plaga ku problemanan manera skarsedat di personal i violensia króniko te ainda.
E falta di personal ta asina severo ku wardadónan di prezu mester traha overtaim durante vários dia òf ta wòrdu obligá pa traha ‘double-shift’. Un informe legislativo di e aña aki a indiká ku mayoria biaha outoridat ta “ignorá mal komportashon òf enkubrí esakinan rutinariamente”.
E direktor nobo di Ofisina di Prizòn Kathleen Hawk Sawyer mester deklará den Komishon Hudisial di Senado djamars.
Dos wardadó di prezu ku tabata na turno pa vigilá Epstein den prizòn ta ser akusá di falsifiká informenan pa skonde e echo ku nan a drumi i pasa tempu riba internèt durante vários ora na lugá di keda pendiente di e prezunan.
Hawk Sawyer a bisa ku e sistemanan penitensiario ta sufriendo komo konsekuensia di redukshonnan di presupuesto riba 7.000 mion dòler. El a agregá ku desde ku el a okupá e puesto el a pone “énfasis pa kubri puestonan vakante”, kapasitá su personal i sigurá ku su empleadonan ta renobá nan kompromiso ku su trabou.
