BOGOTA, AP.- E presidente kolombiano Ivan Duque a informá tokante kaptura di tres miembro di gueria di Ehérsito di Liberashon Nashonal akusá di atentadonan kontra e infrastruktura petrolero den diferente parti di e pais.
Duque a señalá riba Twitter ku integrantenan di ELN, entre otro un di e hefenan di e grupo, a wòrdu arestá den operashonnan realisá pa ehérsito i polis.
E minister di Defensa, Guillermo Botero, a indiká ku vários arma di kandela i munishon a wòrdu konfiská. El a indiká ku aparentemente, e grupo tabata organisá atakenan kontra polis i di infrastruktura petrolero.
Fiskal kolombiano a akusá nan pa delito di rebelion, ladronisia, ekstorshon i asesinato, segun informashonnan.
Leon Valencia, analista i direktor di Fundashon Pas i Rekonsiliashon a bisa na AP ku 673 miembro di ELN a wòrdu kapturá e aña aki. Mas di 35 a muri den konfrontashonnan realisá ku forsa di seguridat
Desde fin di yüli, ELN a realisá vários atentado, spesialmente kontra militar i polisnan. Ademas di sekuestro, e grupo a ataká e infrastruktura di petroli estatal Ecopetrol den diferente parti di e pais.
E aña aki, un di e oleoduktonan prinsipal a wòrdu ataká den mas di 86 atentado.
ELN a inisiá e kombersashonnan di pas ku gobièrnu di eks presidente Juan Manuel Santos den 2017 na Cuba ounke e partinan no por a logra akordá un tregua.
Na momentu ku el a asumí su puesto komo presidente, Duque a señalá ku e lo evaluá e kombersashonnan di pas, pero e atakenan kontinuo di ELN a kanselá e reanudashon di e diálogo. Te ainda e kontakto entre ámbos partido ta di kongelá.
