WASHINGTON, MERKA, AFP.- Un hóben hondureño migrante kende a krusa Merka sin su famia a muri den e pais, segun indikashon di ofisialnan merikano i hondureño.
E Minister di Eksterior Hondureño Enrique Reina a identifiká e hóben di 17 aña komo Angel Eduardo Maradiaga Espinoza, i a bisa ku el a muri na e refugio Safety Harbor na Florida.
Departamento di Salubridat i Servisio Humano (HHS), ku tin un departamento Office of Refugee Resettlement i ku ta supervisá kuido di muchanan migrante no kompaña, a konfirmá e morto pero no a duna niun detaye riba sirkunstansia di e morto.
HHS a bisa ku tin un investigashon tumando lugá aktualmente.
E hóben a drenta den e refugio riba 5 di mei i a muri djárason, asina HHS a bisa.
E morto a pasa den un siman kaminda míles di migrante a hasi un intento pa drenta Merka promé ku e pais a introdusí medidanan fuerte pa tur ku ta krusa frontera ilegalmente.
Minister Reina a rekonosé ku e hóben ta entre e mas ku 10.000 hondureñonan ku a purba drenta Merka tur luna den e último aña ku a pasa.
