PORT-AU-PRINCE.- Pèrtá den outo, riba motosaikel òf na pia, por bisa ku míles di hende ta huyendo for di barionan den kual gèngnan di delinkuente ta manda den e kapital di Haiti. “Nos ta bibando den un situashon ekstremadamente difísil”, asina Elie Derisca, un residente di Carrefour
Feuilles ku ta keda den e distrito di Port-au-Prince, a duna di konosé. “Mi no sa mes unda mi tin di bai, simplemente mi mester a bandoná mi kas”.
Mas ku 3.000 hende a hui for di e barionan, di akuerdo ku un kalkulashon hasí dor di e Departamento di Protekshon Sivil na Haiti, aunke outoridatnan ta kere ku tin mas ku lo bai. E barionan aki riba un base regular ta ser ataká dor di miembronan di un gèng enkabesá pa Renel Destina, konosí pa su alias Ti Lapil i kende ta ser buská pa outoridatnan merikano pa sekuestro di siudadanonan merikano.
