LIMA, PERU, AFP.- Vários míles di persona a manifestá na Lima kontra komunismo djasabra i na fabor di e kandidato presidensial derechista Keiko Fujimori, un siman promé ku elekshon presidensial kaminda e lo enfrentá e iskierdista Pedro Castillo.
“Nos no kier bira un pais komunista manera Venezuela, Cuba òf Bolivia. Nos kier libertat”, asina un hóben manifestante a bisa na AFP.
E pueblo ta rechasá Castillo pa motibu di su lasonan ku e régimen di presidente venezolano Nicolás Maduro. Keiko Fujimori ta enfoká riba e retroseso ku e pais lo sufri si kontinuá ku e rumbo venezolano.
E kandidato iskierdista kier modifiká Konstitushon i efektuá vários nashonalisashon si e gana, pero rechasando un “sistema” venezolano.
E partidarionan di Keiko Fujimori ta purba liga Castillo na e brasa polítiko di e grupo armá Sendero Luminoso, algu ku e kandidato iskierdista ta rechasá.
Sendero Luminoso tabata outor di vários atake terorista durante e konflikto armá den Perú entre 1980 i 2000 kual a laga 70.000 morto.
