CALI, COLOMBIA, AFP.- Nashon Uní a hasi un petishon pa inisiá un investigashon independiente pa motibu ku a reportá desénas di morto den konfrontashonnan e luna aki den protestanan kontra e gobièrnu di Ivan Duque na Colombia.
E konfrontashonnan di djabièrnè último a laga 13 morto segun ofisialnan.
E protestanan ku a kuminsá riba 28 di aprel kontra gobièrnu di Presidente Ivan Duque a hala atenshon internashonal i krítika. E hefe di derechi di Nashon Uní Michelle Bachelet a ekspresá su “preokupashon profundo” pa e insidentenan violento ku ta tumando lugá entre e protestanan.
Bachelet su ofisina a reportá ku individualnan armá, inkluyendo un agente polisial a tira kontra manifestantenan, periodistanan kubriendo e protestanan i pasantenan. Un multitut a bati e agente polisial aki mata despues. Den vários parti di Cali, sivilnan a tira riba e manifestantenan i e agentenan polisial no a tuma akshon kontra esaki.
