Despues di mal tempu
WILLEMSTAD.- Minister di Asuntunan General enkargá ku Agrikultura, Medio Ambiente i Naturalesa señor Gilmar Pisas huntu ku kolaboradónan i direktor di su sektor a bishitá algun playa pa mira i inventarisá e daño despues di e “zuiderwest” di siman pasá. Mester bisa ku trahadónan di AVB for di djaweps siman pasá ya a hasi un rekorido na e diferente playanan den oranan hopi trempan mainta pa asina por a tuma nota di loke tabata pasando i a notifiká minister mesora. Na e momentu ei ya kaba por a tuma nota di basta daño ku laman brutu a okashoná na; Daai Booi, Sta. Cruz, Wèspùnt i Kenepa Grandi i Chikí despues di e esfuersonan i invershon ku a hasi pa ‘upgrade’ nos playanan.
Dor di laman brutu tabata hopi difísil pa por a yega hopi serka. Ora laman tabata mas kalmu minister mes tambe a bai huntu ku kolaboradónan pa asina e tambe presensiá loke a tuma lugá na nos playanan.
E daño ku a konstatá na e playanan ta; “drijflijn” ku laman a lòs for di fondo di laman, palapanan ku a keda destruí i playanan ku hopi piedra grandi. Minister Pisas ya a kuminsá enkaminá e pasonan den e ministerio pa regla e parti finansiero. Kontratistanan tambe ya a tuma nota di e trabounan i por bisa ku no falta muchu pa trabounan di reparashon kuminsá. Komo ku playanan ta un di nos atrakshonnan turístiko prinsipal, ta di sumo importansia pa nan ta na òrdu mas pronto posibel.
