RIO DE JANEIRO,AP.- Un kantidat di 60 prezu a muri i vários di nan su kabes tabata kita afó durante un motin den e prizòn di estado di Amazonas den nort di Brazil, asina outoridatnan a informá djaluna. Esaki tabata e masakre mas pió na Brazil for di 1992. E sekretario di seguridat públiko di e estado, Sergio Fontes a bisa ku un kantidat di hende a hui durante e motin den e lugá Anisio Jobin. A haña un kantidat di 40 prezu bèk. Nan a tene basta wardadó di prezu komo rehen pero niun di nan a keda heridá. Esaki ta e masakre mas pió den un prizòn den historia di Brazil for di despues di morto di 111 persona ku polis a detené na Carandiru di São Paulo na 1992. E polis a bisa ku e agentenan a aktua den defensa propio. Fontes a konfirmá ku hopi di e mortonan tabata sin kabes.
Luis Carlos Valois kende ta e hues ku a negoshá ku e prezunan pa nan por a stòp tambe a bisa ku el a mira hopi kadaver sin kabes. “Nunka ma mira algu asina den mi bida, tur e kurpanan, tantu sanger, asina Valois a skibi riba su Facebook. Outoridatnan a bisa ku e disturbio aparentemente a surgi debí na un pelea entre dos di e gruponan kriminal mas grandi na Brazil pa kontrol di vários prizòn. Segun Fontes e detenidonan a pone algun demanda pa por a pone un paro na e matamentu ku a keda organisá pa un grupo lokal kual ta famianan di nort kontra PCC. E sekretario a bisa ku nan a haña un buraku den e muraya di prizòn kaminda nan ta kere ku e armanan tabata drenta di e via ei. A haña un kantidat di arma di kandela na momentu ku nan tabata buska den e prizòn. PCC ta e banda di droga i di prizòn mas poderoso na Brazil. E motin a kaba despues ku nan a liberá e último 12 empleadonan di e prizòn. Den un otro prizòn 87 prezu a hui den oranan trempan di djaluna, asina a sigui Fonte a bisa. Polisnan ta investigando si ta eksistí vínkulo entre motin i e huimentu.
