FUNZA, COLOMBIA, AP.- Ku e entrega di e último arma na mishon di Nashon Uni na Colombia, e desarme di Forsa Armá revolushonario di Colombia a terminá djabièrnè.
Den un akto pafó di Bogota e mishon di Nashon Uni a presentá e 8.994 armanan konfiská, di kual 6.177 tabata arma di asalto ku e gueria di FARC a entregá. E destrukshon di 1,7 mion munishon, 38 tonelada di eksplosivo i 3.528 mina antipersonal a tuma lugá.
Presidente Santos a gradisí e ròl ku e mishon a hunga den e kòntròl i inspekshon di armanan ku a wòrdu entregá na FARC despues di un proseso di pas ku a dura mas di kuater aña.
“Sin e sosten aki nos lo no por a yega kaminda nos ta. Mi ta probechá di e momentu aki pa gradisí tur hende di diferente nashonalidat i di tur parti di mundu ku komo miembro di e mishon a traha pa pas. Awe ta un dia importante, e proseso di abandono di arma ta terminá”, asina e mandatario kolombiano a indiká.
E visepresidente Oscar Naranjo a bisa na The Associated Press ku “loke tabata imposibel algun tempu pasa a bira un realidat”.
E bosero di Nashon Uni, Jean Arnault, a señalá ku el a kumpli ku a mishon pa opservá e tregua i despues e abandono di arma di parti di FARC kual a wòrdu realisá den tres etapa.