KIEV, AP.- E presidente di Ukrania Volodymyr Zelenskiy a deklará djaluna ku niun hende no por pone preshon riba su pais, pa kuminsá ku un investigashon relashoná ku e prekandidato presidensial demókrata Joe Biden i su yu.
Tantu Ukrania komo Rusia a kritiká Kas Blanku pa publiká e transkripshon di un kombersashon telefóniko privá entre presidente merikano Donald Trump i un gobernante mas.
Zelenskiy ta purbando di kontené e dañonan den su pais i den eksterior despues ku mundu a haña sa ku Trump a preshon’é pa investigá Biden i su yu Hunter, kende tabata miembro di e hunta di un kompania ukraniano di gas.
“No por obligá nos pa hasi nada. Nos ta un pais independiente”, asina Zelenskiy a bisa na reporteronan durante un bishita na un base ukraniano militar.
E presidente a reiterá su kritiká na Kas Blanku su desishon pa publiká un transkripshon di e kombersashon di yüli, kaminda Trump a papia ku Zelenskiy tokante Biden i su yu. E kombersashonnan aki a pone ku a kuminsá ku un investigashon di huisio polítiko den Kongreso.
Zelenskiy a indiká ku Ukrania probablemente lo no publiká su propio transkripshon di e yamada. Kremlin ta di akuerdo ku Zelenskiy.
E bosero di presidente Vladimir Putin a bisa ku e transkripshonnan por wòrdu publiká solamente si akordá mutuamente pa hasi esaki.
