TARBORO, NORTH CAROLINA, AP.- Despues ku awanan di riunan desbordá di North Carolina a baha, algun residente a regresá nan kas i e gobernador a primintí rekonstruí e infrastruktura di e estado despues ku orkan Matthew a laga destrukshonnan atras. Gobernador Pat McCrory a bula e zona di Princeville ku a sufri su di dos inundashon den ménos ku 20 aña djaweps último. E biaha aki e kousa tabata dor di orkan Mattheuw; na aña 1999 tabata pa motibu di orkan Floyd. E gobernador a bisa ku trupanan di guardia nashonal a keda despachá pa e zona den vehíkulonan anfibio pa garantisá ku no tin sakeo na tiendanan komersial i bibienda. “Mi ke pa tur hende sa ku mi ta kampañanan, ku nos lo hasi tur kos posibel pa yuda rekonstruí e siudat”, asina McCrory a deklará. Tambe el a bisa ku mester tuma medida pa esaki no mester bolbe sosedé den futuro. El a atvertí tambe ku e inundashonnan probablemente na sur di Lumberton lo ta mas pió. E inundashonnan kousá pa e tormenta Matthew ku a laga mas di 500 persona morto na Haiti, a laga por lo ménos 38 morto na Estádos Unídos.
McCroy a bisa ku e kantidat di establesimentu sin elektrisidat a disminuí. E sifra di morto na North Carolina a yega na 22, asina el a informá. Sinembargo el a enfatisá ku e inundashonnan a sigui ta un problema grave den zonanan na ost di e estado, den su mayoria zonanan pober. Orkan Floyd a hasi impakto den e estado 15 di sèptèmber na aña 1999, poko despues ku otro orkan a asotá e estado. Dos dia despues e riu Tar a desbordá kousando inundashon kaminda awanan a subi 6 meter.
Agensia Federal den Maneho di Emergensia a otorgá 26 mion di dòler na e habitantenan di Princeville i otro 1.5 mion na e munisipalidat tras di e destrukshon di orkan Floyd.
