BELGRADO, SERBIA, AFP.- Ocho studiante i un bewaker a muri durante un tiroteo na un skol na Belgrado djárason, segun indikashon di ofisialnan. Polis ta akusá un sospechoso di 13 aña di a plania e atake durante un luna i traha un lista ku nòmber ku e mester mata.
E insidente a shòk e nashon. E presidente a bisa ku esaki ta un di e dianan di mas difísil den historia di Serbia.
Ocho mucha i un bewaker a muri, i shete alumno i un maestro a sali heridá, segun indikashon di e ministerio di interior.
E hefe di polis di Belgrado, Veslin Milic a bisa ku shete mucha muhé a muri i tambe un mucha hòmber ku a nase entre 2009 i 2011.
E tiroteo a pasa den oranan di mainta na un skol na Belgrado den distrito di Vracar.
Polis a mobilisá rápidamente pa sera e área miéntras ku mayornan tambe a presentá rápidamente na skol, kaminda tur studiante tabata wardando pafó di e skol.
Violensia armá den skolnan na Servia ta algu sumamente straño, kaminda tur servio mester di un pèrmit spesial pa kumpra arma.
Outoridatnan a identifiká e sospechoso komo Kosta Kecmanovic, un studiante di 13 aña i a bisa ku e tabatin dos arma huntu kuné.
