WASHINGTON, MERKA, AFP.- Un persona a muri i kuater mas a sali heridá djárason den siudat di Atlanta, na sùit di Merka, na momentu ku un hòmber a basha bala den e sala di espera di un hospital segun indikashon di polis.
Polis a menshoná Deion Patterson, un èks miembro di Warda Kosta komo e sospechoso di e tiroteo den hospital Northside, ku a sosodé den oranan di atardi. Patterson ainda tabata fugitivo djárason atardi.
Departamento di Polis di Atlanta a bisa riba retnan sosial ku e sospechoso ta armá i peligroso i niun hende mester aserká e hòmber.
E víktimanan tin entre 25 i 71 aña di edat, segun indikashon di polis den un konferensia di prensa djárason. Tur ta hende muhé, segun indikashon di e alkalde di Atlanta, Adre Dickens.
Patterson a keda kompañá pa su mama den e sala di spera di hospital, kende no a sali heridá den e tiroteo, segun e hefe di polis Schierbaum.
E aña aki Merka a registrá mas ku 190 atake armá masivo, kaminda kuater persona òf mas a muri òf sali heridá, segun indikashon di Gun Violence Archive.
Merka tin e tasa di mas haltu di morto relashoná ku arma di kandela entre paisnan desaroyá. E sifra tabata 45.000 na 2020 i 49.000 na 2021.
