WASHINGTON, AP.- Oposishon venezolano a pidi sekretario general Luis Almagro pa OEA impulsá estadonan miembro pa modifiká leinan pa suspendé visa i sanshoná funshonarionan venezolano akusá di violá derechonan humano i korupshon.
Algun minüt promé di a reuní ku Almagro, e dirigentenan opositor Julio Borges i Carlos Veccio a bisa ku su intenshon tabata pa pidi OEA pa amplia e resolushon adoptá den febrüari ku e voto di 19 Estado miembro kaminda a pidi presidente Nicolás Maduro pa realisá un proseso elektoral ku ta inkluí e partisipashon di tur partido polítiko, opservadornan internashonal independiente, akseso igual na medionan di komunikashon i un Konseho Nashonal Elektoral kual su komposishon ta garantisá su independensia.
Maduro ta buska reelekshon den elekshon organisá pa e luna di mei apesar ku partidonan opositor prinsipal no ta partisipá. Paisnan den e hemisferio a atvertí ku lo no rekonosé e resultadonan, konsiderando ku esakinan no ta kumpli ku stándarnan internashonal.
Veccio a splika ku e profundisashon di e resolushon di febrüari mester konsistí di Estadonan miembro di OEA ku ta modifiká su legislashon respektivo pa imponé kansion kontra funshonarionan venezolano den korupshon i labamentu di plaka i brinda sosten na e salida masivo di venezolanonan.
