CARACAS (AFP).- Outoridatnan venezolano a pone un relashon entre e kandidata opositor Maria Corina Machado i “akshonnan pa destabilisá” riba kaminda pa elekshon presidensial di 28 di yüli i a informá di aresto di dos kolaborador mas yegá na su persona.
E fiskal general Tarik William Saab no a splika, sinembargo, si tin medidanan hudisial partikularmente kontra e lider opositor, faborito den enkuestanan, pero inhabilitá pa 15 aña pa por kumpli ku trabounan públiko. Nan a akus’é di korupshon i di a pidi un invashon estranhero, loke el a nenga.
Saab a splika ku e detenshon di Henry Alviarez i Dignora Hernandez, dirigentenan nashonal dje organisashon polítiko di Machado, Vente Venezuela, a respondé na e “akshonnan pa destabilisá”. El a splika ku ta protesta planiá pa purba na forsa pa rehabilitá Machado promé ku elekshonnan den kua presidente Nicolas Maduro ta aspirá un di tres mandato di seis aña.
“E mishon dje plan tabata pa trese lantamentu den e pais, aglomerá masa usando gremionan sindikal i estudiantil pa yega na un ala militar”, segun Saab den un deklarashon na prensa, den kua el a rekordá otro konspirashonnan denunsiá pa chavismo kontra di Maduro.
“Nos a deskubrí un seri di konspirashon, menasa i akshonnan ku tin komo meta pa sembra violensia i káos den e pais i atentá kontra bida dje presidente i di outoridatnan sivil i militar haltu”, segun el a ekspresá.
Opositornan arestá
Shete kolaborador di Machado a keda arestá den último dianan. Ministerio Publiko a emití otro shete òrdu di kaptura, segun Saab a bisa, un di nan ta di Magalli Meda, man drechi dje eks diputado i señalá komo un alternativa pa keda postulá na su lugá.
Saab a presentá un video di un “konfeshon” di un dje kolaboradornan detené, Emil Brandt Ulloa, den kua e ta bisa ku e kandidata tabata finansiá pa Ofisina di Gobièrnu di Merka pa Desaroyo Internashonal (USAID). Brandt a keda arestá dia 9 di mart.
Apesar di un akuerdo anunsiá pa e gobièrnu di Maduro i oposishon pa revisá e desishonnan pa inhabilitá dirigentenan opositor i den kua Merka tabata klave, e sanshon kontra Machado a keda ratifiká den yanüari pa Korte Supremo.
