LONDON, AP.- E gobièrnu di Gran Bretaña mester oponé na ekstradishon di e fundadó di WikiLeaks, Julian Assange, pa Merka, segun opinion di figuranan influyente di Partido Laborista.
E lider di e partido, Jeremy Corbyn, a tweet ku Washington ta purbando di ekstraditá Assange dor ku el a publiká “evidensia di e atrosidatnan na Irak i Afganistan”.
Diane Abbott, bosero di formashon laborista pa asuntu nashonal, a deklará na BBC ku e gobièrnu mester blòkia e proseso basá riba derechinan humano i dor ku gran parti di e informashon ku el a publiká tabata di interes general.
E kaso di Merka kontra Assange ta tokante e “bèrgwensa pa e kosnan ku el a revelá di ehérsito i servisionan di seguridat merikano”.
Polis a arestá e fundadó di WikiLeaks den embahada di Ecuador na London djaweps, despues ku Quito a retirá e asilo.
Assange ta detené miéntras e ta warda su kondena pa violá e kondishonnan di su fiansa na aña 2012. Ademas, tin un proseso di ekstradishon di Merka pendiente p’e.
