CARACAS, AP.- Tribunal Supremo di Hustisia di Venezuela a suspendé e inhabilitashon riba e eks kandidato presidensial i eks gobernador opositor di estado di Zulia, Manuel Rosales, pa partisipá den eventonan elektoral.
Atraves di un komunikado dibulgá djamars, e organismo a bisa ku ta konsiderá e solisitut di amparo pa suspendé e sanshon di shete aña i seis luna kontra Rosales pa Kontrolaria General na 2014. Na e momentu aki, e sanshon a hustifiká ku argumentonan di supuesto negligensia di parti di e gobernador durante 2002 i 2004.
Rosales a pèrdè kontra eks presidente Hugo Chavez den elekshon di 2006 i a hui den 2009 despues ku fiskal a akus’é di mal uso di fondonan públiko. E polítiko opositor a wòrdu detené den òktober 2015 despues di bolbe e pais ounke e no a wòrdu sentensiá. Finalmente el a wòrdu liberá dia 31 di desèmber 2016.
Kontrolaria, kende tin kòntròl i revishon di tur organismo estatal i funshonarionan públiko den su poder, ta dominá pa gobièrnu i ta wòrdu mira komo un instrumento pa mina kandidaturanan.
