ASUNCION, PARAGUAY, AFP.- Outoridatnan paraguayo a bisa djamars ku no tabatin kuestion di froude durante elekshon presidensial di fin di siman kaminda e kandidato derechista Santiago Peña a gana, kende a pidi e pueblo pa keda trankil despues di protestanan ku su rival a organisá.
Den e kapital, Asuncion, vários siguidó di e kandidato paraguayo Cubas a manifestá djaluna i konfrontá polisnan dilanti di e sede di outoridat elektoral.
“No tin posibilidat di froude”, asina e bosero di tribunal elektoral, Carlos Ljubetic a bisa na periodistanan.
Kas 70 manifestante a keda arestá den oranan di anochi den e pais kompleto pa motibu ku òrdu públiko a wòrdu alterá, segun indikashon di polis.
Vários blokeo di kareteranan a wòrdu kitá djamars mainta.
Cubas a denunsiá supuesto iregularidatnan den e elekshon di djadumingu, kaminda Peña a haña 42% di votonan, sigui pa e kandidato iskierdista Efrain Alegre ku 27 porshento.
Cubas a haña 22% di votonan, kual ta mas di loke a spera. E no a presentá un denunsia ofisial pa respaldá su afirmashonnan di un “froude monumental”.
