CARACAS, AP.- Outoridat venezolano a anunsiá djaluna ku tin un desmantelamentu di e grupo dirigí pa eks polis Oscar Perez despues di un konfrontashon den un bario na wèst di Caracas. Esaki ta inkluí un eks ofisial fugitivo. Aña pasá el a ataká edifisionan gubernamental ku un helikòpter.
Presidente Nicolás Maduro a konfirmá djaluna anochi ku a registrá un konfrontashon armá entre forsanan di seguridat i un grupo rebelde.
Te ainda, outoridat no a logra aklará loke a sosodé ku Perez despues di e konfrontashon.
Maduro a bisa durante su mensahe anual den e pais desde Asamblea Nashonal Konstituyente ku e konfrontashon a kobra bida di dos polis komo konsekuensia di tirunan ku nan a haña den kabes. Esaki a tuma lugá miéntras nan tabata wardando e entrega di rebeldenan. E no a ofresé mas detaye.
E mandatario a indiká ku seis polis mas a resultá gravemente heridá i ku tin mas di sinku miembro di e grupo detené.
E Ministerio di Relashon Interior a indiká den un komunikado ku e miembronan di e organisashon, ku a wòrdu identifiká komo “terorista” a tira kontra integrantenan di kuerponan di seguridat i a purba eksplotá un vehíkulo kargá ku eksplosivo.