SIUDAT DI VATIKANO, AP.- Papa Fransisco a aseptá renunsia di dos obispu chileno mas den un reperkushon di e skandal pa abusu seksual di menornan ku ta afektá e Iglesia Katóliko.
Luna pasá, 31 obispu chileno aktivo a presentá nan resignashon debí ku nan no por a protehá e muchanan di saserdotenan pedofil.
Vatikano a informá ku Fransisco a aseptá e renunsianan di e obispunan di Rancagua, Alejandro Goic Karmelic, i di Talca, Horacio del Carmen Valenzuela Abarca. Esakinan ta suma sinku resignashon aseptá.
Resientemente e pontífise a sostené ku e Iglesia na Chile ta bibando “un kultura di abusu i enkubrimentu” ya pa vários dékada.
Den e diósesis di Rancagua tin 14 saserdote akusá di tene relashon seksual ku menornan.
Elisa Fernandez, denunsiante di e abusunan kometé den e diósesis di Rancagua, a reakshoná rabiá pa aseptashon di e renunsia di Goic, kende a resigná tres aña pasá na momentu ku el a kumpli 75 aña di edat. Esaki ta e edat kaminda religiosonan mester renunsiá.
“Mi ta bastante desilushoná, defroudá i rabiá”, asina el a bisa i a señalá ku despues di reuní ku investigadónan papal mandá pa Fransisco na Chile den febrüari el a pidi pa no aseptá su renunsia ya asina “e por asumí su responsabilidat komo enkubrido den e kaso Rancagua.
