WILLEMSTAD.- Kòrsou ta drei pa gran parti riba un solo pilá ekonómiko ku ta esun turístiko. Apesar ku ta papia konstantemente ku mester desaroyá mas sektor ekonómiko pa generá divisa, krea kuponan di trabou i tambe diversifiká ekonomia, ainda esaki no ta tumando lugá.
Un di potensial sektor ekonómiko nobo ku a identifiká bou di gabinete Rhuggenaath tabata esun di cannabis medisinal. Na mart 2023, esta 1 aña pasá parlamentario pa partido MAN, Giselle Mc William a hasi un apelashon na Minister di GMN, Javier Silvania pa kontinuá ku e proseso den parlamento pa aprobá e lei di cannabis medisinal.
Mientrastantu parlamento tin mas ku 3 aña ta warda riba gobièrnu pa kontestá preguntanan ku a hasi den reunion di Komishon Sentral riba e inisiativa di lei aki. Frakshon di MAN ta mira e sektor aki komo unu ku por kontribuí na desaroyo ekonómiko di pais, kreando kuponan di trabou i tambe generá ingreso pa pais. Ta p’esei e partido ta bisa ku ta importante pa e lei di cannabis medisinal sigui kana e trayekto den parlamento pa yega na tratamentu den un reunion públiko.
Den un karta pa minister Silvania fechá 23 di mart 2023 Mc William ta bisa: “Tin hopi desaroyo mundial, kaminda Kòrsou tambe ta forma parti di dje i ku nos mester gara e oportunidatnan ku tin pa nos. Den e kaso aki di cannabis medisinal, esaki lo bai krea un pilar ekonómiko nobo, krea kuponan di trabou nobo, pero tambe generá ingreso pa nos pais. E ta krea tambe oportunidat pa zona liber i asina aportá na kresementu di nos zona liber, ku tambe mester diversifiká nan produkto.”
Durante tratamentu di presupuesto 2024 a pidi opinion di Minister di Desaroyo Ekonómiko, Ruisandro Cijntje (PNP) riba cannabis medisinal komo sektor di eksportashon.
Den su kontesta e minister mandatario a duna di konosé entre otro ku e proyekto ei no ta algu ku ta forma parti dje akuerdo di gobernashon di e aktual gobièrnu, pero e ta realista i konsiente ku mundialmente ta eksistí e posibilidat di prosesá cannabis pa finnan medisinal.
Den e mesun rosea Cijntje a bisa ku e tópiko aki ta kai bou di ministerio di GMN. Pero den e maneho ku e ta hiba den ministerio di Desaroyo Ekonómiko ta enfoká riba otro sektornan ku tin balor agregá i ku tin potensial pa eksportashon, manera stipulá den e strategia pa eksportashon nashonal.
E strategia aki ta dirigí riba shete (7) sektor di eksportashon. Algun di esakinan ta e sektornan kreativo, sektor di turismo di salú, sektor marítimo i sektor di edukashon.
Minister di Tráfiko, Transporte i Planifikashon Urbano, Charles Cooper resientemente a bisa tin terenonan reservá pa eventualmente bai pa e proyekto di cannabis medisinal si esaki konkretisá. E tereno aki ta keda parti pariba di Kòrsou. Pero si resultá ku e proyekto di cannabis medisinal no ta sigui, ku basta rapides lo por parselá i pone terenonan liber pa praktiká agrikultura.
