LONDON, AP.- E Partido di Independensia di Reino Uní (UKIP) a destituí su dirigente djasabra debí na un skandal pa e mensahenan di teksto rasista mandá pa su frei, loke ta laga un insertidumbre den e futuro di e partido ku ta konfrontando problemanan.
Mayoria di e miembronan a apoyá un moshon di sensura kontra e dirigente di UKIP, Henry Bolton. Tabatin vários petishon di renunsia desde ku un korant a publiká e mensahenan ku Jo Marney a skibi tokante Meghan Markle, e prometida di prens Harry.
Marney, di 25 aña, kende tambe ta integrante di UKIP, a wòrdu suspendé mesora pa e partido.
E salida di Bolton, kende a asumí responsabilidat di e posishon aki den sèptèmber, lo kousa un di kuater kontienda pa e maneho di UKIP desde 2016.
Marney, kende ta deskribí su mes komo modelo i aktris, a manda un amigu mensahenan di teksto publiká djadumingu pa e korant Mail. E medio aki a revelá ku e mensahenan di teksto a inkluí komentarionan ofensivo riba hende koló skur i tabata afirmá ku Markle lo “mancha” e famia real.
Marney a diskulpa pa e “lenguahe bergonsoso”, pero a señalá ku su palabranan a wòrdu saká for di konteksto.