BLANTYRE, MALAWI, AFP.- Mas di 400 malawi ku a wòrdu repatriá, inkluyendo un kantidat di pashènt ku COVID-19, a hui di karentena i isolashon den siudat di Blantyre, segun indikashon di un ofisial di salú.
E 441 personanan a wòrdu tres’é for di Suráfrika djaluna, kaminda nan a keda pegá despues ku e pais a sera frontera den mart pa kontené propagashon di e Coronavirus.
Mas di 10 tabata den un sentro di isolashon despues di a tèst positivo na frontera. E sobrá tabata den karentena den un stadion di futbòl, kaminda nan tabata wardando pa haña resultado di tèst. E ofisial di salú Gift Kawaladzira a bisa ku a desplegá ku ekipo pa lokalisá esnan ku a skapa.
